Rais Kulisuka Upya Baraza la Mawaziri

RAIS wa Tanzania, Jakaya Kikwete sasa anajipanga kuunda Baraza jipya la Mawaziri baada ya yeye kuwasilisha hoja ya kulivunja baraza hilo kwenye Kamati Kuu ya CCM leo na kamati hiyo kuridhia hoja yake. Rais Kikwete analazimika kufanya hivyo baada ya mawaziri waliotuhumiwa kufuja fedha za umma bungeni hivi karibuni kugoma kujiuzulu.

Kwa mujibu wa taarifa iliyotolewa kwa vyombo vya habari leo na CCM baada ya kikao cha Kamati Kuu, Rais Kikwete amewasilisha wazo la kulivunja Baraza lake la Mawaziri na kulisuka upya ili kuwaondoa viongozi walioshindwa kusimamia wizara zao.

“Kamati Kuu imeridhika na imebariki uamuzi wa Rais Kulisuka Upya Baraza lake la Mawaziri na taasisi zingine zilizoanishwa katika ripoti hizo. Imesisitiza utekelezaji wa uamuzi huo ufanywe mapema iwezekanavyo,” imesema taarifa hiyo.

Kamati Kuu pia imeridhishwa na kuheshimu haki na wajibu wa wabunge kujadili utendaji wa Serikali yao na kupongeza juhudi za serikali kuhakikisha kuwa ripoti ya Mkaguzi na Mdhibiti Mkuu wa Hesabu za Serikali inajadiliwa kwa uwazi na hivyo kuibua mapungufu yaliyojadiliwa.

Aidha taarifa hizo zote zimewasilishwa kwenye kikao cha Kamati Kuu na kujadiliwa. Pamoja na taarifa hizo Kamati Kuu imepokea taarifa ya jinsi Rais alivyojipanga kuchukua hatua za kuwawajibisha mawaziri na watendaji wa serikali na wale wa mashirika ya umma waliobainika kuhusika na ubadhirifu ulioinishwa na taarifa ya Mkaguzi na mdhibiti mkuu wa hesabu za Serikali, Kamati za kudumu za bunge na wabunge bungeni.

katika kikao hicho pia kilipokea taarifa na maazimio ya Kamati ya wabunge wa CCM na Kamati ya uongozi ya wabunge wa CCM juu ya kilichotokea kwenye bunge lililopita mjini Dodoma.

Aidha Kamati Kuu imeipongeza Kamati Teule ya baraza la wawakilishi Zanzibar iliyoundwa kuchunguza utendaji katika sekta mbalimbali kwenye serikali ya mapinduzi Zanzibar kwa taarifa yao.
Kamati Kuu inawapongeza wajumbe wa Baraza la Wawakilishi kwa jinsi walivyojadili taarifa hiyo na pia Kamati Kuu inaipongeza Serikali ya Mapinduzi Zanzibar kwa kuipokea taarifa na kuanza kuifanyia kazi.