“NINAOMBA jamii inisaide nisome, niokoeni na ukatili huu wa wazazi wangu wanaotaka kuniozesha tena kwa nguvu kwa mwanaume asiye chaguo langu.
"Wazazi wangu wamesahau kwamba mimi bado ni mwanafunzi, najisikia vibaya kweli nikose kusoma kwa sababu tu ya ndoa, mimi siwezi kukubali kuolewa.”
Hiyo ni kauli na malalamiko ya mwanafunzi wa darasa la saba katika Shule ya Msingi Kingo, Kata ya Masagaru Wilayani Kilindi, Ngaisi Islamoi (13) ambaye anaishi kama mkimbizi kwa diwani wa Kata ya Masaguru, Mohammed Makengwa kwa muda mrefu sasa.
Binti huyo anakizungumzia kwa huzuni kisa cha baba yake mzazi kujaribu kumwozesha kwa mwanaume kwa mahari ya ng’ombe watano.
Akiwa mafichoni nyumbani kwa Diwani Abubakari Makengwa, mwanafunzi huyo anaeleza historia yake kuwa alizaliwa mwaka 1999 mkoani Manyara akiwa mtoto wa pili katika familia ya Islamoi Kuresoi na mama Helena Lolamatu.
Anasema baadaye wazazi wake walihamia Kilindi kwa ajili ya kutafuta ardhi ya mifugo pamoja na kilimo ndipo wakafikia kitongoji cha Chang’ombe, Kijiji cha Kwamba Kata ya Masagaru.
Wakiwa kijijini hapo wazazi wake walimwandikisha yeye na kaka yake Memarut Islamoi katika Shule ya Msingi Kingo na mwaka juzi mdogo wake aitwaye Loynyake pia aliandikishwa shuleni hapo.
“Miaka yote nilikuwa nahudhuria masomo bila matatizo na nashukuru Mungu maendeleo yangu darasani yalikuwa yakienda vizuri na walimu walinisifu kwa kujitahidi,” anaeleza.
Anaongeza kuwa mwanzo wa mateso yake ulikuwa mwaka jana wakati akiwa darasa la sita ambapo mwezi Oktoba baba yake alimwamuru aache shule na kumjulisha kwamba anatakiwa kuolewa wakati wowote kwani tayari ameshaanza kutolewa mahari ya ng’ombe.
“Baba aliniambia wazi wazibila kificho kwamba lazima niache shule ili niolewe na kijana wa kutoka familia ya mzee mmoja mfugaji wa asili ya Kimasai kama sisi ambaye amepangiwa kulipa ng’ombe watano kama mahari na kwamba tayari ng’ombe dume mmoja alishakuwa ametolewa,”anasema.
Binti huyo mwanafunzi huyo anasema alipoelezwa kuhusu suala hilo la kuolewa hakumjibu chochote baba yake kwa kuwa kwa mujibu wa mila na desturi za kabila lao msichana au hata mwanamke haruhusiwi kujibishana na mwanaume.
Hata hivyo, anasema suala la kuolewa lilimshtua sana , likamnyima raha sana na kumtoa machozi. Anaeleza kuwa alitafakari na kuanza kusaka mbinu za kujiokoa kwa kumfuata mama yake mzazi na kumwambia kuwa hataki kuolewa na badala yake anataka kuendelea na masomo na ndipo alipohakikishwa na mama yake kuwa atafanya kila njia ili kuhakikisha anasoma.
Anasema wiki moja baadaye wakati akijiandaa kwenda shule asubuhi alibaini kwamba sare zake na daftari zilikuwa zimefichwa na alipomwuliza mama yake alimwambia kuwa baba yake ndiye aliyezificha kwa sababu hataki kusikia yeye akiendelea kusoma.
“Nilishindwa hata kufanya mtihani wa darasa la sita wa kwenda la saba kwa sababu sare zangu zilifichwa , nikaenda kutoa taarifa kwa mwalimu mkuu,lakini baadaye baba akaniambia kuwa hata mwalimu hatanisaidia lolote kwani ameshamalizana naye,” anasimulia.
Anaeleza kuwa jambo hilo lilimumiza sana kichwa akaamu kumfuata ofisa elimu wa Wilaya ya Kilindi na kumshitaki mzazi wake, lakini kwa sababu likizo ilikuwa imeanza alimtaka afanye subira hadi zifunguliwe shule mwezi Januari mwaka huu.
“Ilipofika Januari na shule zilipofunguliwa nilimfuata tena ofisa elimu, kisha nikaenda kituo cha polisi, lakini baba alipoitwa na kuhojiwa, hali kwangu ilikuwa mbaya zaidi nyumbani kwani alisema nitamkoma kwa sababu nataka kumfunga na kwamba sitafanikiwa, nitaolewa tu.”
Anasema kuwa mambo yalipozidi kuwa magumu kwake aliamua kukimbilia kwa diwani wa Kata ya Masagaru kuomba maskani kwani alihisi maisha yake yalikuwa hatarini.
Binti huyo anaongeza kuwa hayuko tayari kuolewa kwa sasa bali kiu yake ni kusoma hadi kiwango cha chuo kikuu ili apate kazi itakayomsaidia kuwalea wazazi wake pamoja na wadogo zake kwa sababu familia yake inaishi maisha duni.
Anaongeza kuwa haamini kama kweli mahari ya ng’ombe watano iliyotolewa ili aolewe kama itawaweza kuwakwamua wazazi wake kwenye maisha duni bali anachoamini yeye ni kuwa kwa wakati huu elimu pekee ndiyo mkombozi.
“Nimeapa! Siko tayari kuolewa nataka kusoma hadi chuo kikuu ili nipate kazi nzuri ambayo itaniwezesha kuisaidia familia yangu ambayo inaishi maisha duni na siamini kama ng’ombe watano watasaidia,kama ni ng’ombe nitanunua nikianza kujitegemea nikiwa na kazi yangu,”anasema.
Naye diwani (Makengwa) anakiri kumpokea mwanafunzi huyo na kusisitiza kuwa atahakikisha binti huyo ambaye amekuwa mkimbizi kwake atasoma kwa njia yoyote kwa kuwa ni haki yake ya msingi.
Anaongeza kuwa yeye kama mwakilishi wa wananchi hawezi kuona wanafunzi wasichana wakiachishwa masomo ili waolewe.
“Baba yake anatumia fedha kuzinyamazisha mamlaka husika ili zisichuke hatua hatimaye binti huyu aolewe, lakini kwetu amekwama kwani mimi, ofisa elimu wa wilaya pamoja na mwalimu mkuu wa shule ya Kingo tumekaa imara kuhakikisha binti hyuyo (Ngaisi) haachishwi masomo yake,”anasema diwani .
Mwalimu mkuu wa shule hiyo, Juma Bwaki anasema amefanya kila njia kuhakikisha mwanafunzi huyo hakatishwi masomo kwani amewezesha kupatikana kwa namba yake ya kufanyia mtihani wa taifa wa darasa la saba mwishoni mwa mwaka huu ambayo ni nambari 026 .
Ofisa Elimu wa Wilaya ya Kilindi, Gideon Mwesiga anasema tatizo la mwanafunzi huyo kutaka kukatishwa masomo lilianza tangu mwaka jana, lakini jitihada za kumnusuru zinaendelea kufanyiika kwa kutumia vyombo vya dola na vya sheria.
“Binti huyu ni mwanfaunzi anastahili sifa na kwa kweli anahitaji kuendelezwa kwani maendeleo yake kitaaluma ni mazuri, lakini ikizingatiwa kuwa anatoka familia ya wafugaji amefanya ujasiri wa hali ya juu kulifichua suala hili”anasema Mwesiga.
No comments:
Post a Comment